Барилга Хот Байгуулалтын Яамтай Монголын Барилгын Үндэсний Ассоциаци ТББ болон барилгын салбарын бусад холбоод төрийн зарим чиг үүргийг гэрээний үндсэн дээр үргэлжлүүлэн гүйцэтгүүлэх тухай гэрээнд гарын үсэг зурлаа.

Гэрээ байгуулахын өмнө БХБЯ-ны Төрийн нарийн бичгийн дарга С.Магнайсүрэн төрийн зарим чиг үүргийг төрийн бус байгууллагууд онц сайн үнэлгээтэй гүйцэтгэж байгаад талархлаа илэрхийлж, цаашид төрийн энэхүү ажил үүргийг гэрээгээр гүйцэтгэж байгаа байгууллагууд хоорондоо төлөвлөгөөтэй, уялдаа холбоотой хамтран ажиллахыг уриаллаа.

Гэрээ байгуулагдсанаар Монголын Барилгын Үндэсний Ассоциацийн Барилгын үйл ажиллагааны тусгай зөвшөөрлийн хэлтэс барилгын үйл ажиллагааны тусгай зөвшөөрөл олгох ажлыг 2020 оны 2-р сарын 10-наас 2023 оны 2-р сарын 10 хүртэл 3 жилийн хугацаатай гүйцэтгэхээр боллоо.

Монголын Барилгын Үндэсний Ассоциаци ТББ нь БХБЯ-аас зарласан төрийн зарим чиг үүргийг гэрээгээр гүйцэтгэх сонгон шалгаруулалтад салбарын төрийн бус байгууллагуудтай хамтран Консорциум байгуулан оролцож “Барилга байгууламжийн зураг төсөл боловсруулах, барилгын ажил гүйцэтгэх, өргөх байгууламж, түүний эд ангийн үйлдвэрлэл, угсралт, засвар үйлчилгээ эрхлэх хуулийн этгээдэд тусгай зөвшөөрөл олгох урьдчилсан дүгнэлт гаргах”, зөвшөөрөл олгох ажлыг 3 дахь жилдээ амжилттай зохион байгуулж байна.

Энэ хугацаанд тусгай зөвшөөрөл олгох үйл ажиллагааг иргэдэд ил тод нээлттэй, түргэн шуурхай болгох чиглэлээр анхаарч ажилласан бөгөөд үүний үр дүнд барилгын үйл ажиллагааны тусгай зөвшөөрөл олгох асуудлаар урьдчилсан дүгнэлт гаргах ажлын хэсгийн хурал тогтмолжиж, аж ахуйн нэгж, байгууллагуудын хүсэлтийг ажлын 2-5 хоногийн дотор багтаан шийдвэрлэдэг болсон билээ.